thainewsupdate | Fastest Loading Responsive Blogger Template 2015

OPEC: អ្នកផលិតប្រេងត្រូវទទួលខុសត្រូវរួម

ក្រុងរីយ៉ាដៈ រដ្ឋមន្ដ្រីប្រេងរបស់អារ៉ាប៊ីសាអ៊ូឌីតថ្លែងថា ក្រុមប្រទេសផលិតប្រេងនៅក្រៅអង្គការប្រទេសនាំចេញប្រេង (OPEC) ត្រូវសហការដើម្បីជំរុញតម្លៃប្រេងឆៅដែលកំពុងធ្លាក់ចុះ ព្រោះ OPEC មិនអាចទទួលខុសត្រូវតែម្នាក់ឯងទេ។

លោក Ali al-Naimi បានលើកឡើងក្នុងសុន្ទរកថាមួយកាលពីថ្ងៃចន្ទដែលស្រង់សម្ដីដោយភ្នាក់ងារសារព័ត៌មានសាអ៊ូឌីត (SPA) ថា៖ «យើងមិនទទួលខុសត្រូវតែម្នាក់ឯងទេ ដោយសារ OPEC ផលិត៣០ភាគរយនៃទិន្នផលលើទីផ្សារ ហើយ៧០ភាគរយចេញពីខាងក្រៅ»។

តម្លៃប្រេងឆៅបានធ្លាក់ចុះប្រហែល៦០ភាគរយនៅចន្លោះពីខែមិថុនាដល់ខែកុម្ភៈ ដែលបានធ្លាក់ចុះដោយការផ្គត់ផ្គង់របស់ពិភពលោកលើសតម្រូវការ និងការបារម្ភអំពីតម្រូវការនៅទ្រឹង។ ការធ្លាក់ចុះនេះកាន់តែខ្លាំងទៅកាលពីខែវិច្ឆិកានៅពេល OPEC បដិសេធកាត់បន្ថយការផលិតដោយលើកឡើងថាចង់រក្សាចំណែកទីផ្សារ។

អង្គការដែលមានសមាជិក១២ប្រទេសនេះនាំមុខដោយអារ៉ាប៊ីសាអ៊ូឌីតជាប្រទេសផលិតឈានមុខគេ ដែលបូមប្រេងប្រហែល១ភាគ៣នៃប្រេងរបស់ពិភពលោក ប៉ុន្តែប្រទេសផលិតធំៗផ្សេងទៀតដូចជាប្រទេសរុស្ស៊ី មិនជាប់ពាក់ព័ន្ធជាមួយនឹងការសម្រេចចិត្តរបស់ខ្លួនទេ។

នៅពេលត្រូវបានសួរថាតើ OPEC នឹងមានបំណងធ្វើការងារជាមួយប្រទេសមិនមែនជាសមាជិកឬទេ លោក Naimi បានបញ្ជាក់ថា ការធ្លាក់ចុះកាលពីឆ្នាំ១៩៩៨ នៅពេល OPEC បានសហការជាមួយបណ្ដាប្រទេសផលិតផ្សេងទៀតដើម្បីកាត់បន្ថយទិន្នផល និងគាំទ្រដល់តម្លៃប្រេង។ លោក Naimi បានថ្លែងថា៖

«បច្ចុប្បន្ន ស្ថានការណ៍មានការពិបាក។ យើងបានព្យាយាមជួបជាមួយពួកគេ ប៉ុន្តែមិនទទួលបានជោគជ័យទេដោយសារតែពួកគេបញ្ជាក់ថា OPEC គួរតែទទួលខុសត្រូវរឿងនេះតែម្នាក់ឯង»។

រដ្ឋមន្ដ្រីប្រទេសអារ៉ាប៊ីសាអ៊ូឌីតបានថ្លែងថា៖ «ទាំងអស់គ្នាត្រូវតែរួមចំណែកប្រសិនបើយើងចង់ធ្វើឲ្យតម្លៃល្អប្រសើរឡើងដោយសារតែវាកំពុងស្ថិតនៅក្នុងផលប្រយោជន៍របស់ប្រទេសទាំងអស់»។

តម្លៃប្រេងបានធ្លាក់ចុះនៅក្នុងការជួញដូរអាស៊ីកាលពីថ្ងៃចន្ទជាមួយនឹងតម្លៃប្រេងគោល West Texas Intermediate អាមេរិកសម្រាប់ការចែកចាយនៅខែឧសភាបានធ្លាក់ចុះ៦៥សេន ក្នុងតម្លៃ៤៥,៩២ដុល្លារអាមេរិក ហើយតម្លៃប្រេង Brent បានធ្លាក់ចុះមកនៅត្រឹម៥៤,៧៤ដុល្លារ។

សារព័ត៌មាន Bloomberg News បានដកស្រង់សម្ដីលោក Naimi ដោយលើកឡើងថា ប្រទេសលោកកំពុងផលិតប្រេងឆៅជិត១០លានបារ៉ែលក្នុងមួយថ្ងៃ។ តាម Bloomberg ប្រទេសអារ៉ាប៊ីសាអ៊ូឌីតបានបូមប្រេង៩,៨៥លានបារ៉ែលក្នុងមួយថ្ងៃកាលពីខែកុម្ភៈ៕ PB

ភាគហ៊ុន Great Wall កើនខណៈមានទំនុកចិត្តវិញ

ក្រុងប៉េកាំងៈ តម្លៃភាគហ៊ុន Great Wall Motor Co ដែលជាក្រុមហ៊ុនផលិតរថយន្ត SUV ធំជាងគេរបស់ប្រទេសចិនបានកើនឡើងខ្លាំងនៅក្នុងការជួញដូរនៅទីក្រុងហុងកុងបន្ទាប់ពីការប្រកាសថាខ្លួននឹងបន្តការលក់រថយន្ត SUV មានតម្លៃខ្ពស់នៅខែមេសា។

តម្លៃភាគហ៊ុនរបស់ក្រុមហ៊ុន Great Wall កើនឡើង ៣,៤ ភាគរយ ដល់ ៥០,៩៥ ដុល្លារហុងកុងនៅពេលបិទការជួញដូរដែលជាកម្រិតខ្ពស់បំផុតចាប់តាំងពីក្រុមហ៊ុនបានឡើងផ្សារហ៊ុន កាលពីឆ្នាំ ២០០៣ ខណៈដែលតម្លៃគោលក្រុមហ៊ុន Hang Seng Index នៅហុងកុងកើន ០,៥ ភាគរយ។ តម្លៃភាគហ៊ុនដែលបានជួញដូរនៅទីក្រុងស៊ាងហៃរបស់ខ្លួនបានកើនឡើង ៥,៧ ភាគរយ។

បន្ទាប់ពីការផ្អាកពីរដងក្នុងការលក់រថយន្ត SUV តម្លៃខ្ពស់បំផុតរបស់ខ្លួន រថយន្តម៉ូដែល H8 ការកែលម្អបញ្ហាខាងគុណភាព ក្រុមហ៊ុននេះបានឲ្យដឹងកាលពីសប្ដាហ៍មុនថា ខ្លួននឹងបង្ហាញវានៅក្នុងការតាំងពិព័រណ៍រថយន្តនៅទីក្រុងស៊ាងហៃ និងបន្តលក់ទូទាំងប្រទេសនៅខែមេសា។

ភាគហ៊ុនក្រុមហ៊ុន Great Wall បានបង្ហាញពីការកើនឡើងប្រចាំឆ្នាំតិចតួចបំផុតកាលពីឆ្នាំមុនចាប់តាំងពីឆ្នាំ២០០៨ បន្ទាប់ពីការពន្យារពេលបានធ្វើឲ្យខូចដល់ទំនុកចិត្តនៃកិច្ចខិតខំប្រឹងប្រែងរបស់ក្រុមហ៊ុនក្នុងការឆ្ពោះទៅមុខលើសពីការផលិតរថយន្តមានតម្លៃទាប។

ក្រុមហ៊ុនផលិតរថយន្តនេះបានផ្អាកការចែកចាយរថយន្ត H8 កាលពីខែឧសភាមុនបន្ទាប់ពីអតិថិជនបានរាយការណ៍ថាឮ «សំឡេងគោះ» ពេលកំពុងបើកបរនៅក្នុងល្បឿនលឿន។

ក្រុមហ៊ុនបានឲ្យដឹងថា ការលក់នឹងចាប់ផ្ដើមឡើងវិញបន្ទាប់ពីរថយន្តឆ្លើយតបបានតាម«ស្ដង់ដារខ្ពស់»។

ប៉ុន្តែរថយន្តនេះក៏ត្រូវបានពន្យារពេលជាថ្មី កាលពីខែ មករា ឆ្នាំនេះ៕ PB

បុគ្គលិកនៅក្នុងសេវាកម្មម៉ាស្សា-ស្ប៉ាត្រូវទទួលការបណ្តុះបណ្តាល

ភ្នំពេញៈ ដើម្បីផ្ដល់អាជីពដល់ឧស្សាហកម្មម៉ាស្សារបស់កម្ពុជា មជ្ឈមណ្ឌលម៉ាស្សា និងស្ប៉ានឹងតម្រូវឲ្យបុគ្គលិកយ៉ាងហោចណាស់ ៣០ ភាគរយមានការបណ្ដុះបណ្ដាល និងមានការបញ្ជាក់។ នេះតាមសារាចរថ្មីចេញពីក្រសួងទេសចរណ៍។

នេះជាផ្នែកមួយនៃវិធានការក្នុងការកែលម្អការយល់ដឹងរបស់ឧស្សាហកម្មម៉ាស្សាកម្ពុជាដែលមិនមានប្រព័ន្ធទទួលស្គាល់គុណភាពជាផ្លូវការនោះ។

លោក តែន រតនា ប្រធាននាយកដ្ឋានអប់រំ និងបណ្ដុះបណ្ដាលនៅក្រសួងទេសចរណ៍បានប្រាប់ភ្នាក់ងារសារព័ត៌មាន AKP ថា៖ «ប្រជាជនធ្លាប់តែយល់ឃើញតែភាពអវិជ្ជមានពីសេវាកម្មនេះ ហើយទាក់ទងនឹងការរួមភេទ។ សារាចរនេះនឹងផ្លាស់ប្តូរការយល់ឃើញនេះ»។

ក្រុមបណ្ដុះបណ្ដាលដំបូងបានចាប់ផ្ដើមនៅសប្ដាហ៍នេះដោយសហការជាមួយនឹងមជ្ឈមណ្ឌលម៉ាស្សាដែលមានស្រាប់ ហើយនឹងផ្ដោតលើការកែលម្អជំនាញម៉ាស្សាជាមូលដ្ឋាន និងជំនាញបដិសណ្ឋារកិច្ច ដែលការចំណាយជាបន្ទុកម្ចាស់ហាង។

ជាការឆ្លើយតបនឹងការពិតដែលថា មានតែបុគ្គលិក ៣០ ភាគរយប៉ុណ្ណោះនៅពេលនេះតម្រូវឲ្យមានសញ្ញាបត្រមិនមែនបុគ្គលិកទាំងអស់នោះទេ។

លោក ទិត្យ ចន្ថា រដ្ឋលេខាធិការក្រសួងទេសចរណ៍បានបញ្ជាក់ថាដំណើរការនេះចាំបាច់ត្រូវធ្វើ «មួយជំហានម្ដងមួយជំហានម្ដង»។ លោកលើកឡើងថា៖ «បើយើងធ្វើ ១០០ ភាគរយ ដូច្នេះយើងត្រូវតែបិទមជ្ឈមណ្ឌលទាំងអស់សិន»។

លោក Jean-Claude Dhuez ជាជនជាតិបារាំងដែលបើកដំណើរការមជ្ឈមណ្ឌលសុខភាពផ្ទាល់ខ្លួននៅទីក្រុងភ្នំពេញ ហើយត្រូវបានគេជ្រើសរើសធ្វើជាអ្នកបណ្ដុះបណ្ដាលដោយក្រសួងបានឲ្យដឹងថា ការផ្តួចផ្ដើមនេះសំដៅកែលម្អវិស័យបដិសណ្ឋារកិច្ចរបស់កម្ពុជាឲ្យស្របនឹងស្ដង់ដារអាស៊ាន។

ប៉ុន្តែលោកបន្ថែមថា នៅខណៈនេះព័ត៌មានលម្អិតរបស់ផែនការនេះហាក់ដូចជា «មិនច្បាស់លាស់» ។ ឧទាហរណ៍ ដូចជាចំនួនពិតប្រាកដនៃពេលវេលាដែលត្រូវចំណាយលើការបណ្ដុះបណ្ដាលដល់អ្នកម៉ាស្សានៅតែមិនច្បាស់លាស់។

អ្នកគ្រប់គ្រងមជ្ឈមណ្ឌលស្ប៉ាមានតម្លៃខ្ពស់មួយរូបនៅខេត្តសៀមរាបដែលបានស្នើសុំមិនប្រាប់ឈ្មោះបានថ្លែងថាការបង្កើត ប្រព័ន្ធទទួលស្គាល់គុណភាពនៅកម្ពុជាបែបនេះនឹងជួយដល់អាជីវកម្មរបស់ខ្លួនអាចសន្សំប្រាក់ពីបុគ្គលិក ២០ នាក់ អ្នកគ្រប់គ្រងរូបនេះបន្តថា ការទទួលបានសញ្ញាបត្រនៅកម្ពុជានឹងមានតម្លៃទាបជាងបញ្ជូនពួកគេទៅថៃ ដើម្បីចូលសាលាអាជីព៕PB

ផលិតភាព និងប្រាក់ចំណូលនៅថៃ មានភាពវិជ្ជមាន

ក្រុងបាងកកៈ ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ (NESDB) របស់ប្រទេសថៃបានរាយការណ៍ពីការអភិវឌ្ឍប្រកបដោយវិជ្ជមានចំពោះ ប្រាក់ចំណូល និងផលិតភាពពលកម្មនៅត្រីមាសទីបួន និងប្រចាំឆ្នាំ ២០១៦។
ការងារក្នុងវិស័យកសិកម្មបានធ្លាក់ចុះនៅត្រីមាសទីបួនក្នុង ឆ្នាំ ២០១៦ ដោយសារការធ្វើកសិកម្មត្រូវបានពន្យារពេលដោយសារតំបន់ធ្វើកសិកម្ម មួយចំនួនត្រូវបានបំផ្លិចបំផ្លាញដោយគ្រោះទឹកជំនន់។
ការងារក្នុងវិស័យផលិតកម្ម និងដឹកជញ្ជូនក៏បានធ្លាក់ចុះផងដែរ តែការងារក្នុងវិស័យសំណង់ វិស័យលក់ដុំ និងលក់រាយ វិស័យសណ្ឋាគារ និងភោជនីយដ្ឋានបានបង្ហាញពីកំណើន។
អត្រាគ្មានការងារធ្វើសរុបនៅត្រីមាសទីបួនកាលពីឆ្នាំមុនមាន អត្រា ០,៩៧ ភាគរយដោយបានកើនឡើងបន្តិចសម្រាប់ម៉ោងធ្វើការជាមធ្យមក្នុងវិស័យ ឯកជនពីអត្រា ៤៧,១ ម៉ោងក្នុងមួយសប្តាហ៍នៅក្នុងរយៈពេលដូចគ្នាកាលពីឆ្នាំ ២០១៥ ដល់ ៤៨,៩ ម៉ោងក្នុងមួយសប្តាហ៍ដែលអង្គភាពរៀបចំផែនការនេះបានឲ្យដឹងថាជា សញ្ញាមួយនៃការស្ទុះងើបឡើងវិញនៃសេដ្ឋកិច្ច។ កម្លាំងពលកម្មសរុបមាន ៣៧,៩ លាននាក់នៅត្រីមាសទីបួន។
សម្រាប់រយៈពេលពេញមួយឆ្នាំ ២០១៦ អត្រាគ្មានការងារធ្វើបានកើនឡើងខ្ពស់ជាងឆ្នាំ ២០១៥ បន្តិចស្មើនឹង ១ ភាគរយនៃកម្លាំងពលកម្មសរុប រីឯប្រាក់ឈ្នួល និងប្រាក់បៀវត្សរ៍វិញ ដោយមិនរាប់បញ្ចូលប្រាក់ឈ្នួលក្រៅម៉ោង និងអត្ថប្រយោជន៍ផ្សេងៗបានកើនឡើង ១,៨ ភាគរយ។ ផលិតភាពពលកម្មបានកើនឡើង ៤,១ ភាគរយ។
កម្លាំងពលកម្មសរុបមានចំនួន ៣៨,៣ លាននាក់ក្នុងឆ្នាំ ២០១៦ ពោលគឺទាបជាងឆ្នាំ ២០១៥ បន្តិចដែលមានកម្លាំងពលកម្មសរុប ៣៨,៥ លាននាក់។
ក្រុមប្រឹក្សា NESDB បានព្យាករថាស្ថានភាពការងារនឹងល្អប្រសើរនៅឆ្នាំនេះដោយត្រូវបាន ជំរុញដោយសេដ្ឋកិច្ចថៃ និងការនាំចេញដែលកំពុងកើនឡើងក៏ដូចជាតម្លៃកសិផលកាន់តែខ្ពស់ផង ដែរ។
ទោះជាយ៉ាងនេះក្តីទីភ្នាក់ងារនេះបានព្រមានថាស្ថានភាពគ្រោះ រាំងស្ងួតអាចនឹងមានផលប៉ះពាល់ខ្លះលើការងារនៅប្រទេសថៃក្នុងវិស័យ កសិកម្មក្នុងឆ្នាំនេះដោយបានជំរុញឲ្យរដ្ឋាភិបាលពិនិត្យតាមដានយ៉ាង ហ្មត់ចត់ចំពោះវិស័យនេះហើយរិះរកវិធានការជំនួយ។
ក្រុមប្រឹក្សា NESDB ក៏បានរាយការណ៍ពីកំណើនអត្រាគ្មានការងារធ្វើនៅខែមករាផងដែរ ដោយពលករគ្មានការងារធ្វើមានចំនួនស្មើនឹង ១,២ ភាគរយនៃកម្លាំងពលកម្មសរុប ជាពិសេសចំពោះនិសិ្សតដែលទើបបញ្ចប់ការសិក្សា។
ក្រុមប្រឹក្សា NESDB បានបន្តឲ្យដឹងថា៖ «ទោះជាយ៉ាងនេះក្តី យើងសង្ឃឹមថាការនាំចេញកាន់តែខ្ពស់ និងការវិនិយោគឯកជនដែលកំពុងកើនឡើងក៏ដូចជាវិស័យកសិកម្មដែលកំពុង មានស្ថានភាពល្អប្រសើរនឹងជួយស្រូបយកនិសិ្សតដែលទើបតែបញ្ចប់ការ សិក្សាក្នុងឆ្នាំនេះ»។
ក្រុមប្រឹក្សា NESDB មិនទាន់បានអនុវត្តការសិក្សាពីផលប៉ះពាល់ដោយសារបច្ចេកវិទ្យា និងការប្រើប្រាស់គ្រឿងម៉ាស៊ីនក្នុងស្ថានភាពការងាររបស់ប្រទេសនេះ នៅឡើយទេ៕ BP

ការជួបប្រជុំរបស់ ECB ស្ថិតនៅក្រោមសម្ពាធ ខណៈអតិផរណាកើនឡើងខ្ពស់

ក្រុងហ្វ្រែងហ្វឺតៈ ក្រុមអ្នកវិភាគបានឲ្យដឹងថាទេសាភិបាលធនាគារកណ្តាលអឺរ៉ុប (ECB) ទំនងជានឹងប្រឆាំងទៅនឹងការអំពាវនាវឲ្យបញ្ចប់ការបញ្ចេញសាច់ ប្រាក់ងាយស្រួលនៅពេលក្រុមមន្ត្រីទាំងនោះជួបប្រជុំនៅថ្ងៃ ព្រហស្បតិ៍សប្តាហ៍នេះ បើទោះជាអតិរផណានៅតំបន់ប្រើប្រាស់ប្រាក់អឺរ៉ូបានកើនឡើងដល់ ទិសដៅជិត ២ ភាគរយរបស់ខ្លួនក្តី។
តួលេខរបស់ការិយាល័យស្ថិតិអឺរ៉ុប Eurostat បានបង្ហាញកាលពីសប្តាហ៍មុនថាអតិផរណានៅក្នុងតំបន់ប្រើប្រាស់ រូបិយប័ណ្ណរួមដែលមានសមាជិកចំនួន ១៩ ប្រទេសនេះមានអត្រា ២ ភាគរយកាលពីខែកុម្ភៈពោលគឺជាលើកដំបូងគិតចាប់តាំងពីឆ្នាំ ២០១៣ មកដែលអតិផរណាមានកម្រិតខ្ពស់ជាងទិសដៅរបស់ធនាគារកណ្តាលអឺរ៉ុបដែល កំណត់ត្រឹម «ក្បែរ តែទាបជាង ២ ភាគរយ»។
សូម្បីតែកាលពីពេលមុនក្រុមអ្នករិះគន់បានជំរុញឲ្យធនាគារ កណ្តាលមួយនេះកាត់បន្ថយវិធានការបន្ធូរបន្ថយគោលនយោបាយរូបិយវត្ថុ ដ៏ធំរបស់ខ្លួនដែលរួមមានការទិញមូលបត្របំណុលរបស់រដ្ឋាភិបាល និងក្រុមហ៊ុនចំនួនរាប់ពាន់លានអឺរ៉ូរៀងរាល់ខែ ការផ្តល់ឥណទានដែលមានអត្រាការប្រាក់ទាបទៅឲ្យធនាគារពាណិជ្ជ និងអត្រាការប្រាក់ទាបបំផុតក្នុងប្រវត្តិសាស្រ្តជាដើម។
តែក្រុមអ្នកបង្កើតគោលនយោបាយនៅធនាគារកណ្តាលអឺរ៉ុបបានជំទាស់ថា ការកើនឡើងភ្លាមៗនៃកំណើនថ្លៃទំនិញក្នុងតំបន់ប្រើប្រាស់ប្រាក់ អឺរ៉ូគិតចាប់តាំងពីខែធ្នូមកនោះគឺគ្រាន់តែជាឥទ្ធិពល បណ្តោះអាសន្នមួយនៃតម្លៃថាមពលដែលបានកើនឡើងប៉ុណ្ណោះ។
លោក Mario Draghi ប្រធានធនាគារកណ្តាលអឺរ៉ុបបានប្រាប់សមាជិកសភាអឺរ៉ុបកាលពីខែ កុម្ភៈថា៖ «យើងមិនត្រូវប្រតិកម្មចំពោះចំណុចទិន្នន័យផ្ទាល់ និងកំណើនអតិផរណាក្នុងរយៈពេលខ្លីនោះទេ»។
លោកបានបន្តថា៖ «ការគាំទ្រដែលទទួលបានពីវិធានការគោលនយោបាយរូបិយវត្ថុនៅតែត្រូវការជាចាំបាច់»។
ក្រុមអ្នកវិភាគភាគច្រើនយល់ស្របនឹងសមាជិកក្រុមប្រឹក្សាភិបាល ប្រតិបត្តិធនាគារកណ្តាលអឺរ៉ុបថាទំនិញដែលមានតម្លៃប្រែប្រួលខ្លាំង ដូចជា ស្បៀងអាហារ និងថាមពលសម្ពាធជាមូលដ្ឋានលើតម្លៃទំនិញដែលបង្កឡើងដោយសារប្រភព ទំនិញប្រើប្រាស់ជាប់បានយូរការដំឡើងប្រាក់ឈ្នួលសម្រាប់ពលករនៅ តែមានស្ថានភាពទន់ខ្សោយខ្លាំងក្នុងការកែតម្រូវការផ្លាស់ប្តូរ កញ្ចប់វិធានការជំរុញនេះ។
លោកស្រី Jennifer McKeown ដែលបម្រើការនៅក្នុងក្រុមហ៊ុន Capital Economics បានឲ្យដឹងថា៖ «អតិផរណាស្នូល (មិនរាប់បញ្ចូលទំនិញដែលប្រែប្រួលតម្លៃលឿន) នៅតែមានកម្រិតទាប បើទោះជាមានកំណើនអត្រាអតិផរណាក្តី»។

ការនាំចូលរបស់ប្រទេសចិន កើនឡើងជិត ៤០ ភាគរយនៅខែកុម្ភៈ

ក្រុងប៉េកាំងៈ ទិន្នន័យកាលពីថ្ងៃពុធបានបង្ហាញថាការនាំចូលរបស់ប្រទេសចិនបាន កើនឡើងជិត ៤០ ភាគរយកាលពីខែមុនដែលត្រូវបានជំរុញដោយតម្លៃទំនិញកាន់តែខ្ពស់ និងតម្រូវការក្នុងស្រុកខ្លាំងដោយបានបង្កើនក្តីសង្ឃឹមថា សេដ្ឋកិច្ចធំជាងគេទីពីររបស់ពិភពលោកមួយនេះកំពុងវិលត្រលប់មករក គន្លងកំណើនវិញហើយ។
កំណើនខ្ពស់ជាងការព្យាករ ៣៨,១ ភាគរយនេះធៀបនឹងរយៈពេលដូចគ្នាកាលពីឆ្នាំមុននេះគឺខ្ពស់ជាងពីរ ដងធៀបនឹងកំណើន ២០ ភាគរយដែលឋិតក្នុងការអង្កេតរបស់ទីភ្នាក់ងារព័ត៌មាន Bloomberg ចំណែកឯការនាំចេញវិញបានធ្លាក់ចុះ ១,៣ ភាគរយពោលគឺទាបជាងការព្យាករខ្លាំងដែលថាអាចធ្លាក់ចុះ ១៤ ភាគរយ។
តួលេខទាំងនេះបានធ្វើឲ្យចិនទទួលរងឱនភាពពាណិជ្ជកម្ម ៩,១៥ ពាន់លានដុល្លារដែលជាឱនភាពដំបូងរបស់ប្រទេសនេះក្នុងរយៈពេលបី ឆ្នាំ។
ក្រុមអ្នកវិភាគបានឲ្យដឹងថាលទ្ធផលនៅខែកុម្ភៈកើតមានដោយសារ តម្រូវការក្នុងស្រុកខ្ពស់ តម្លៃទំនិញអន្តរជាតិថ្លៃ និងការផ្លាស់ប្តូរពេលវេលានៃរដូវបុណ្យចូលឆ្នាំប្រពៃណីចិនដែលជំរុញ ឲ្យមានការធ្លាក់ចុះសកម្មភាពនៅតាមរោងចក្រ និងកំពង់ផែ។
មេដឹកនាំនានាទំនងជារីករាយចំពោះតួលេខនាំចេញនេះខណៈមេដឹកនាំ ទាំងនោះគ្រោងនឹងរៀបចំសេដ្ឋកិច្ចឡើងវិញពីសេដ្ឋកិច្ចដែលត្រូវបាន ជំរុញដោយការនាំចេញ និងការវិនិយោគរបស់រដ្ឋមកសេដ្ឋកិច្ចដែលពឹងផ្អែកលើតម្រូវការ ប្រើប្រាស់ក្នុងស្រុកវិញ។
តួលេខទាំងនេះកើតឡើងបន្ទាប់ពីសេចក្តីរាយការណ៍ល្អពីកំណើននៅត្រីមាសទី ៤ និងសកម្មភាពរោងចក្រកាលពីខែកុម្ភៈ។
លោក Wen Bin អ្នកស្រាវជ្រាវប្រចាំក្រុមហ៊ុន China Minsheng Banking Corp នៅទីក្រុងប៉េកាំងបានប្រាប់ទីភ្នាក់ងារព័ត៌មាន Bloomberg ថាការនាំចូលបានកើនឡើងដោយសារសកម្មភាពសេដ្ឋកិច្ចស្ទុះងើបឡើងវិញ និងកំណើនតម្លៃទំនិញ។

CBL ដំណើរការផលិតស្រាបៀរ Heineken នៅកម្ពុជា លើកដំបូង

ភ្នំពេញៈ ក្រុមហ៊ុនផលិតស្រា បៀរ Cambodia Brewery Limited (CBL) កាលពីថ្ងៃម្សិលមិញបានដំណើរការចង្វាក់ផលិតកម្មស្រាបៀរ Heineken លើកដំបូងនៅកម្ពុជា ដែលស្ថិតក្រោមផែនការពង្រីកចង្វាក់ផលិតកម្មទីពីរ ១០០លានដុល្លារ។
ការពង្រីកចង្វាក់ផលិតកម្មនេះ នឹងធ្វើឲ្យក្រុមហ៊ុនអាចបង្កើនសមត្ថភាពផលិតស្រាបៀរទាំងអស់របស់ ខ្លួនរហូតដល់បីដងច្រើនជាងមុន។
CBL បានបើកដំណើរការផលិតស្រាបៀរម៉ាកល្បីៗជាច្រើននៅកម្ពុជាតាំងពី ឆ្នាំ ១៩៩៦ ក្នុងទឹកប្រាក់វិនិយោគ ៥៦លានដុល្លារ ដែលជាការសហការវិនិយោគរវាងក្រុមហ៊ុនក្នុងស្រុក វឌ្ឍនៈ គ្រុប និងក្រុមហ៊ុនផលិតស្រាបៀរអាស៊ីប៉ាស៊ីហ្វិក (APB) ដែលបច្ចុប្បន្នផ្តូរឈ្មោះទៅជា Heineken Asia Pacific។
លោក Frans Eusman ប្រធានក្រុមហ៊ុន Heineken Asia Pacific បានលើកឡើង កាលពីម្សិលមិញថា តម្រូវការស្រាបៀរនឹងបន្តកើនឡើងនៅកម្ពុជាស្របតាមការកើនឡើង សេដ្ឋកិច្ច និងបែបបទនៃការរស់នៅរបស់ប្រជាជនកម្ពុជា។
លោកបន្តថា ខ្សែចង្វាក់ផលិតកម្មថ្មីនេះបានជួយឲ្យ CBL ពង្រីកកត្តាផលិតកម្មរបស់ខ្លួនដោយអាចផ្គត់ផ្គង់ស្រាបៀរពី ៨០ លានលីត្រ ទៅ ៣០០ លានលីត្រក្នុងមួយឆ្នាំ ឬពី ២៧ ០០០ កេសក្នុងមួយថ្ងៃ ទៅ១០ ម៉ឺនកេសក្នុងមួយថ្ងៃ។ មិនត្រឹមតែប៉ុណ្ណោះ ក្រុមហ៊ុន CBL បានបន្ថែមការផលិតស្រាបៀរប្រភេទថ្មី គឺស្រាបៀរHeineken ដែលជាស្រាបៀរលំដាប់អន្តរជាតិទៀតផង។
លោកថ្លែងថា៖ «បច្ចុប្បន្ននេះ ក្រុមហ៊ុន CBL បានទទួលនូវការអនុញ្ញាតពីក្រុមហ៊ុន Heineken ក្នុងការផលិតស្រាបៀរ Heineken ដ៏ល្បីល្បាញរបស់ពិភពលោកនៅកម្ពុជា ដែលនេះជាសក្ខីភាពមួយបង្ហាញថាកម្ពុជាជាមជ្ឈរមណ្ឌលផលិតស្រាបៀរដែល មានគុណភាពកម្រិតខ្ពស់បំផុតលំដាប់ពិភពលោក»។
បច្ចុប្បន្នក្រុមហ៊ុន CBL បានផលិតស្រាបៀរដែលមានស្រាប់របស់ខ្លួន ស្រាបៀរ Tiger ស្រាបៀរ ABC Extra Stout ស្រាបៀរ Anchor និងស្រាបៀរ Gold Crown ហើយ Heineken ជាចង្វាក់ផលិតកម្មថ្មីមួយរបស់ខ្លួន។
លោក អ៊ុំ សុថា អ្នកនាំពាក្យក្រសួងឧស្សាហកម្ម និងសិប្បកម្ម បានឲ្យដឹង កាលពីម្សិលមិញថា នៅពេលនេះក្រុមហ៊ុន CBL នឹងផលិតស្រាបៀរ Heineken ផ្ដាច់មុខសម្រាប់ទីផ្សារកម្ពុជា ដែលជាសញ្ញាល្អសម្រាប់ឧស្សាហកម្មផលិតស្រាបៀរកម្ពុជា ដែលងាកទៅរកផលិតផលមានគុណភាពកាន់តែខ្លាំង។

លោកលើកឡើងថា៖ «នឹងលែងមានការនាំចូលស្រាបៀរ Heineken មកទីផ្សារក្នុងស្រុកទៀតហើយ ប៉ុន្តែការផ្គត់ផ្គង់ស្រាបៀរត្រូវបានចែកចាយដោយស្រាបៀរក្នុងស្រុក» ។
លោកបន្ថែមថា ការទទួលបានសិទ្ធិផលិតដូចជា យីហោស្រាបៀរល្បីៗដូចជា ស្រាបៀរ Heineken គឺជាការផ្លាស់ប្តូរដ៏ធំមួយ។
លោកបញ្ជាក់ថា៖ «នេះឆ្លុះបញ្ចាំងថា ការផលិតរបស់ក្រុមហ៊ុន CBL គោរពតាមស្ដង់ដារអន្តរជាតិដោយមានគុណភាពដូចគ្នានឹងស្រាបៀរ Heineken ដែលផលិតនៅក្នុងប្រទេសផ្សេងទៀត»។

ក្រុមអ្នកវិភាគ អ្នករកស៊ីនៅក្នុងឧស្សាហកម្មនេះ និងម្ចាស់ហាងបានបញ្ជាក់ថា ប្រជាជនកម្ពុជាកំពុងផឹកស្រាបៀរកាន់តែច្រើនឡើងៗ។ និន្នាការនេះកំពុងជំរុញឲ្យក្រុមហ៊ុនផលិតស្រាបៀរត្រូវបង្កើនការ ផលិតនៅក្នុងប្រទេសកម្ពុជា។
មានក្រុមហ៊ុនផលិតស្រាបៀរធំៗ ៣ នៅក្នុងប្រទេសកម្ពុជារួមទាំងក្រុមហ៊ុន CBL។
ក្រុមហ៊ុនស្រាបៀរ Cambrew ដែលជាក្រុមហ៊ុនផលិតស្រាបៀរចាស់ជាងគេរបស់កម្ពុជា បានចាប់ផ្ដើមប្រតិបត្តិការកាលពីឆ្នាំ ១៩៩២។ ក្រុមហ៊ុននេះផលិតស្រាបៀរ អង្គរ ស្រាបៀរ អង្គរ្រដាហ្វ ស្រាបៀរអង្គរអិចស្រ្ដាស្ដោត ស្រាបៀរបាយ័ន ស្រាបៀរ Black Panther និងស្រាបៀរ Klang។

ក្រុមហ៊ុន Khmer Beverages ដែលជាក្រុមហ៊ុនផលិតស្រាបៀរកម្ពុជា បានឲ្យដឹងកាលពីដើមឆ្នាំនេះថា ខ្លួនជិតបញ្ចប់ការពង្រីករោងចក្ររបស់ខ្លួនដែលនឹងផលិតស្រាបៀរ ច្រើនជាងមុន ៣ដង។

លោក Peter Leang ប្រធានក្រុមហ៊ុន Khmer Bevarage បានប្រាប់ភ្នំពេញប៉ុស្ដិ៍កាលពីខែមករា ថា ក្រុមហ៊ុនរបស់លោក បានដាក់ទុនវិនិយោគ ១២០ លានដុល្លារក្នុងការពង្រីករោងចក្រផលិតរបស់ខ្លួន និងបន្ថែមចង្វាក់ផលិតស្រាបៀរថ្មី។

លោកនាយករដ្ឋមន្ដ្រី ហ៊ុន សែន ដែលបានចូលរួមក្នុងពិធីសម្ពោធដាក់ឲ្យប្រើប្រាស់រោងចក្រខ្សែ ចង្វាក់ទី ២ របស់ក្រុមហ៊ុន CBL កាលពីម្សិលមិញ បានជំរុញឲ្យមានការវិនិយោគស្រាបៀរកាន់តែច្រើន និងឧស្សាហកម្មផ្សេងទៀតនៅក្នុងប្រទេសកម្ពុជា ដើម្បីឆ្លើយតបនឹងតម្រូវការកើនឡើងរបស់ប្រជាជនកម្ពុជា។

យោងតាមការសិក្សាពីទីផ្សារស្រាបៀរអាស៊ីប៉ាស៊ីហ្វិក របស់ Heineken បានបង្ហាញថា ទំហំទីផ្សារស្រាបៀរនៅក្នុងប្រទេសកម្ពុជាមានប្រហែល៦,១លាន ហិកតូលីត្រក្នុងមួយឆ្នាំកាលពីឆ្នាំ២០១៥ ដោយការបរិភោគស្រាបៀររបស់មនុស្សម្នាក់ៗចំនួន ៣៨,៦លីត្រក្នុងមួយឆ្នាំ។